Cafodd Maria Kerr ei geni ym Mhontypridd ym 1944 gan ddechrau gweithio yn un ar bymtheg oed mewn ysbyty bwthyn lleol. Yn ddwy ar bymtheg fe ymunodd â Chorfflu Nyrsio Brenhinol Y Frenhines Alexandra, QARANC, ac yn sgil hynny fe hyfforddodd i fod yn nyrs gan deithio yn y DU a'r Dwyrain Pell. Fe gyfarfu â'i gŵr ym 1965 ac fe briodon nhw’r flwyddyn ganlynol yn Nhrefforest. Fe gawson nhw eu plentyn cyntaf yno ym 1967. Fe symudodd y teulu am gyfnod byr i'r Alban lle cawson nhw ddau blentyn arall, cyn dychwelyd i Dde Cymru ym 1972. Fe groesawon nhw bedwerydd plentyn ym 1982 ac fe aeth Maria yn ôl at ei gwaith nyrsio drachefn pan roedd y plant yn hŷn, gan ymddeol yn 2019 â hithau'n 75. Fe ddechreuodd ymchwilio i hanes ei theulu, gan gyhoeddi ei llyfr cyntaf am hanes ei theulu Flesh on Their Bones, yn 2022, ac ail lyfr, Ladder of My Life, yn 2024, mae'r ddau ar gael yn Llyfrgell Pontypridd.